შპს „მოვედი მობილითი“-ს პლატფორმით სარგებლობის სამომხმარებლო ხელშეკრულება

1. ტერმინთა განმარტებები

ხელშეკრულებაში გამოყენებულ ტერმინებს, თუ კონტექსტიდან სხვა რამ არ გამომდინარეობს, აქვს შემდეგი მნიშვნელობა:

• 1.1. პლატფორმა — შპს „მოვედი მობილითი“-ს კუთვნილი მობილური აპლიკაცია (iOS, Android) და ვებ-გვერდი, რომლის მეშვეობითაც მომხმარებელს საშუალება ეძლევა მოიძიოს, დაჯავშნოს და გადაიხადოს პარკინგის საფასური.
• 1.2. მომხმარებელი — ნებისმიერი ფიზიკური (ქმედუნარიანი, 18 წელს მიღწეული) ან იურიდიული პირი, რომელიც გაივლის რეგისტრაციას პლატფორმაზე და სარგებლობს პლატფორმის მომსახურებით.
• 1.3. პარკინგის ოპერატორი (მომსახურების გამწევი) — მესამე მხარე — ფიზიკური ან იურიდიული პირი, რომელიც კანონიერ საფუძველზე ფლობს/მართავს შესაბამის პარკინგის ზონას/ავტოსადგომს და უშუალოდ უზრუნველყოფს მომხმარებლისათვის პარკინგის მომსახურების გაწევას.
• 1.4. პარტნიორული ხელშეკრულება — შეთანხმება პლატფორმასა და პარკინგის ოპერატორს შორის, რომლის საფუძველზეც ოპერატორი აცხადებს თანხმობას პლატფორმის მეშვეობით განათავსოს და გაყიდოს პარკინგის ადგილები.
• 1.5. ჯავშანი — პლატფორმის მეშვეობით მომხმარებლის მიერ არჩეული პარკინგის ადგილი და დროის ინტერვალი, რომლის საფასურიც გადახდილია წინასწარ ან/და დადასტურებულია პლატფორმის მიერ.
• 1.6. საგადახდო პროვაიდერები — კომპანიის პარტნიორი ფინანსური/საგადახდო ინსტიტუტები: შპს „თიფეი“ (Flitt, ს/კ 402291220) და სს „საქართველოს ბანკი“ (BOG, ს/კ 204378869), რომლებიც უზრუნველყოფენ პლატფორმაზე უსაფრთხო ელექტრონულ ანგარიშსწორებას.
• 1.7. ანგარიში (Account) — პლატფორმაზე მომხმარებლის მიერ რეგისტრაციის შედეგად შექმნილი პერსონალური პროფილი, სადაც ინახება მისი მონაცემები და ტრანზაქციების ისტორია.

2. ხელშეკრულების საგანი და პლატფორმის როლი

2.1. წინამდებარე ხელშეკრულების საგანს წარმოადგენს პლატფორმის მიერ მომხმარებლისათვის ტექნოლოგიური/საინფორმაციო მომსახურების გაწევა, რაც მოიცავს პარკინგის ადგილების მოძიების, წინასწარი დაჯავშნისა და გადახდის ტექნიკური შესაძლებლობის უზრუნველყოფას.

2.2. პლატფორმის სამართლებრივი სტატუსი:

• მომხმარებელი აღიარებს და ეთანხმება, რომ შპს „მოვედი მობილითი“ წარმოადგენს მხოლოდ შუამავალ ტექნოლოგიურ პლატფორმას მომხმარებელსა და პარკინგის ოპერატორს შორის.
• კომპანია არ წარმოადგენს პარკინგის ზონის/ავტოსადგომის მფლობელს ან ოპერატორს და უშუალოდ არ ეწევა სატრანსპორტო საშუალების განთავსებისა და დაცვის მომსახურებას.
• უშუალო ხელშეკრულება პარკინგის მომსახურების გაწევის შესახებ ფორმდება მომხმარებელსა და შესაბამის პარკინგის ოპერატორს შორის.

3. რეგისტრაცია და ანგარიშის უსაფრთხოება

• 3.1. პლატფორმის მომსახურებით სარგებლობისათვის მომხმარებელი ვალდებულია გაიაროს რეგისტრაცია და მიაწოდოს პლატფორმას უტყუარი, ზუსტი და სრული ინფორმაცია (სახელი, გვარი, ტელეფონის ნომერი, ელ. ფოსტა, ავტომობილის სახელმწიფო ნომერი და ა.შ.).
• 3.2. მომხმარებელი სრულად არის პასუხისმგებელი მისი ანგარიშის მონაცემების (მათ შორის, პაროლის, ერთჯერადი კოდების) კონფიდენციალურობის დაცვაზე.
• 3.3. ანგარიშიდან განხორციელებული ნებისმიერი ქმედება ითვლება უშუალოდ მომხმარებლის მიერ განხორციელებულად. მესამე პირის მიერ ანგარიშზე არასანქცირებული წვდომის შემთხვევაში, მომხმარებელი ვალდებულია დაუყოვნებლივ აცნობოს კომპანიას.
• 3.4. ანგარიშის წაშლა: მომხმარებელს ნებისმიერ დროს შეუძლია ანგარიშის წაშლა აპლიკაციაში ან ვებგვერდზე, „ანგარიშის“ გვერდზე, ღილაკით „ანგარიშის წაშლა“. წაშლა საჭიროებს დადასტურებას და მისი გაუქმება შეუძლებელია.
• 3.5. ანგარიშის წაშლა შეუძლებელია, სანამ მომხმარებელს აქვს აქტიური ჯავშანი ან პარკირება, ან პლატფორმის მეშვეობით წარმოქმნილი გადაუხდელი დავალიანება (მაგ. გადაცილების საფასური). ისინი ჯერ უნდა დასრულდეს ან დაიფაროს.
• 3.6. ანგარიშის წაშლისას იშლება მომხმარებლის სახელი, ტელეფონის ნომერი და ელ. ფოსტა, ანგარიშიდან იხსნება მისი ავტომობილები და მომხმარებელი გამოდის ყველა მოწყობილობიდან. ჯავშნებისა და გადახდების ჩანაწერები ინახება მომხმარებლის პერსონალური მონაცემების გარეშე, საბუღალტრო და საგადასახადო მიზნებისთვის კანონმდებლობით დადგენილი ვადით. შენახული ბარათების წასაშლელად მომხმარებელმა ანგარიშის წაშლამდე უნდა გამოიყენოს ღილაკი „ბარათის წაშლა“ (პუნქტი 4.5). ანგარიშის წაშლით წინამდებარე ხელშეკრულება წყდება.

4. ანგარიშსწორება და გადახდის არხები

4.1. პლატფორმაზე რეგისტრაციის გავლის შემდეგ, მომხმარებელს საშუალება აქვს განახორციელოს წინასწარი ანგარიშსწორება პარკინგის ჯავშნისათვის.

4.2. გადახდის მეთოდები და არხები: ანგარიშსწორება ხორციელდება ელექტრონულად, პლატფორმაზე ინტეგრირებული ავტორიზებული საგადახდო არხების მეშვეობით:

• Flitt — ოპერირებს შპს „თიფეი“ (ს/კ 402291220);
• BOG — ოპერირებს სს „საქართველოს ბანკი“ (ს/კ 204378869).

4.3. საბანკო ბარათის მონაცემების დამუშავება და ტრანზაქციების უსაფრთხოება უზრუნველყოფილია უშუალოდ საგადახდო პროვაიდერების (შპს „თიფეი“ და სს „საქართველოს ბანკი“) მიერ. კომპანია საკუთარ სერვერებზე არ ინახავს მომხმარებლის საბანკო ბარათის სრულ მონაცემებს (CVV/CVC კოდებს, ბარათის სრულ ნომერს).

4.4. ფასები: პარკინგის მომსახურების ტარიფებს ადგენს უშუალოდ პარკინგის ოპერატორი. პლატფორმაზე წარმოდგენილი ფასები მოიცავს კანონმდებლობით გათვალისწინებულ გადასახადებს, თუ კონკრეტული ოპერატორის გვერდზე სხვა რამ არ არის მითითებული.

4.5. შენახული ბარათი და განმეორებადი გადახდები:

• როდესაც მომხმარებელი ანგარიშზე ამატებს ბარათს ან გადახდისას თანხმდება ბარათის შენახვაზე, ბარათი ინახება საგადახდო პროვაიდერთან (შპს „თიფეი“ / Flitt ან სს „საქართველოს ბანკი“ / BOG), რომელიც კომპანიას ბარათის ნაცვლად გადასცემს დაცულ ტოკენს. ახლად დამატებული ბარათის ვერიფიკაციისთვის შესაძლოა ჩამოიჭრას მცირე თანხა, რომელიც დაუყოვნებლივ ბრუნდება.
• ბარათის შენახვით მომხმარებელი კომპანიას ანიჭებს უფლებას, ბარათის მონაცემების ხელახლა შეყვანის გარეშე ჩამოჭრას ამ ბარათიდან (განმეორებადი, კომპანიის მიერ ინიცირებული გადახდები): დაჯავშნილ დროზე გადაცილების საფასური, პარკირების გაგრძელების საფასური და მომხმარებლის მიერ გაკეთებულ ჯავშანთან დაკავშირებული სხვა დავალიანება. თითოეული თანხა გამოითვლება პლატფორმაზე მითითებული შესაბამისი პარკინგის ოპერატორის ტარიფებით. კომპანია შენახული ბარათიდან თანხას ფიქსირებული პერიოდულობით არ ჩამოჭრის.
• მომხმარებელს ნებისმიერ დროს შეუძლია შენახული ბარათის წაშლა აპლიკაციაში ან ვებგვერდზე, ანგარიშის გადახდის მეთოდების განყოფილებაში, ღილაკით „ბარათის წაშლა“. ბარათის წაშლის შემდეგ კომპანია მისგან თანხას აღარ ჩამოჭრის. ბარათის წაშლა არ აუქმებს ჯავშანთან დაკავშირებით უკვე წარმოქმნილ დავალიანებას, რომელიც უნდა დაიფაროს სხვა გადახდის მეთოდით.

5. ჯავშნის გაუქმება და თანხის დაბრუნების პოლიტიკა

5.1. გაუქმების პოლიტიკის ინდივიდუალურობა: მომხმარებელი იღებს ცნობას და ეთანხმება, რომ ჯავშნის გაუქმებისა და თანხის დაბრუნების კონკრეტულ პირობებსა და ვადებს ადგენს უშუალოდ შესაბამისი პარკინგის ოპერატორი.

5.2. ინფორმაციის გამჭვირვალობა: კონკრეტული პარკინგის ოპერატორის მიერ დადგენილი ჯავშნის გაუქმების წესები, საკომისიოები (ასეთის არსებობისას) და თანხის დაბრუნების პირობები მომხმარებელს მკაფიოდ ეთითება ჯავშნის განთავსებისა და გადახდის პროცესში, უშუალოდ ტრანზაქციის დადასტურებამდე.

5.3. თანხის დაბრუნება და ჩარჯბექი (Chargeback):

მომხმარებლის მიერ ჯავშნის გაუქმების, მომსახურების ჩაშლის ან სადავო ტრანზაქციის (Chargeback) შემთხვევებში, თანხის დაბრუნების/ჩარჯბექის პროცესის ადმინისტრირებასა და უზრუნველყოფას ახორციელებს შპს „მოვედი მობილითი“ საგადახდო პროვაიდერებთან (Flitt / BOG) თანამშრომლობით.

დასაბუთებული პრეტენზიის ან ჩარჯბექის მოთხოვნის შემთხვევაში, შპს „მოვედი მობილითი“ განიხილავს განაცხადს და დადასტურების შემთხვევაში უზრუნველყოფს თანხის დაბრუნებას მომხმარებლის იმავე საბანკო ანგარიშზე/ბარათზე, საიდანაც განხორციელდა გადახდა, 1–5 საბანკო დღის ვადაში.

5.4. თუ მომხმარებელი დაარღვევს პარკინგის ოპერატორის მიერ დადგენილ გაუქმების ვადას ან არ გამოცხადდება დაჯავშნილ ადგილზე (No-Show), გადახდილი თანხა დაბრუნებას არ ექვემდებარება, თუ ოპერატორის წესებით სხვა რამ არ არის გათვალისწინებული.

6. მხარეთა უფლებები და მოვალეობები

6.1. მომხმარებელი ვალდებულია:

• დაიცვას პარკინგის ოპერატორის მიერ დადგენილი შიდა განაწესი, საგზაო მოძრაობის წესები და უსაფრთხოების ნორმები.
• განათავსოს სატრანსპორტო საშუალება მხოლოდ მისთვის გამოყოფილ/დაჯავშნილ ადგილას და მითითებული დროის ინტერვალში.
• დროულად გაათავისუფლოს პარკინგის ადგილი ჯავშნის ვადის ამოწურვისთანავე. დროის გადაცილების შემთხვევაში, მომხმარებელს შესაძლოა დაეკისროს დამატებითი საფასური ან/და ჯარიმა პარკინგის ოპერატორის წესების შესაბამისად.

6.2. კომპანია უფლებამოსილია:

• ცალმხრივად შეზღუდოს ან გაუქმოს მომხმარებლის ანგარიში, თუ მომხმარებელი არღვევს წინამდებარე ხელშეკრულების პირობებს ან ეწევა არაკეთილსინდისიერ/თაღლითურ ქმედებას.
• ტექნიკური პროფილაქტიკური სამუშაოების ჩატარების მიზნით დროებით შეაჩეროს პლატფორმის ფუნქციონირება წინასწარი შეტყობინებით ან მის გარეშე.

7. პასუხისმგებლობის შეზღუდვა

7.1. კომპანია არ იღებს პასუხისმგებლობას:

• პარკინგის ოპერატორის მიერ მომსახურების არაჯეროვნად ან უხარისხოდ გაწევაზე.
• პარკინგის ტერიტორიაზე მომხმარებლის სატრანსპორტო საშუალების, მასში არსებული ნივთების დაზიანებაზე, დაკარგვაზე ან ქურდობაზე (აღნიშნულზე პასუხისმგებლობა ეკისრება უშუალოდ მომხმარებელს ან/და პარკინგის ოპერატორს).
• მომხმარებლის მიერ პლატფორმაზე არასწორი მონაცემების (მაგ. არასწორი ავტომობილის სახელმწიფო ნომრის) შეყვანის გამო დამდგარ უარყოფით შედეგებზე.
• საგადახდო პროვაიდერების (შპს „თიფეი“ / Flitt, სს „საქართველოს ბანკი“ / BOG) ტექნიკური შეფერხებებით გამოწვეულ შეყოვნებებზე ან შეცდომებზე.

7.2. ნებისმიერ შემთხვევაში, კომპანიის მაქსიმალური ფინანსური პასუხისმგებლობა მომხმარებლის წინაშე შემოიფარგლება კონკრეტული სადავო ჯავშნისათვის მომხმარებლის მიერ ფაქტობრივად გადახდილი თანხის ოდენობით.

8. ფორს-მაჟორი

• 8.1. მხარეები თავისუფლდებიან პასუხისმგებლობისგან ხელშეკრულებით ნაკისრი ვალდებულებების სრული ან ნაწილობრივი შეუსრულებლობისათვის, თუ აღნიშნული გამოწვეულია გადაუდებელი და დაუძლეველი ძალის გარემოებებით (ფორს-მაჟორი).
• 8.2. ფორს-მაჟორულ გარემოებებს მიეკუთვნება (მაგრამ არ შემოიფარგლება): სტიქიური უბედურებები (ხანძარი, წყალდიდობა, მიწისძვრა), საომარი მოქმედებები, გაფიცვები, მასობრივი არეულობები, სახელმწიფო ორგანოების აქტები/შეზღუდვები, გლობალური ინტერნეტ-ქსელის ან ელექტროენერგიის მასშტაბური გათიშვა, კიბერშეტევები კომპანიის სერვერებზე ან საგადახდო სისტემებზე.
• 8.3. მხარე, რომელსაც შეექმნა ფორს-მაჟორული გარემოება, ვალდებულია გონივრულ ვადაში (შესაძლებლობის ფარგლებში) აცნობოს მეორე მხარეს ასეთი გარემოებების დადგომისა და სავარაუდო ხანგრძლივობის შესახებ.

9. პერსონალურ მონაცემთა დაცვა

• 9.1. კომპანია ამუშავებს მომხმარებლის პერსონალურ მონაცემებს „პერსონალურ მონაცემთა დაცვის შესახებ“ საქართველოს კანონისა და კომპანიის „კონფიდენციალურობის პოლიტიკის“ შესაბამისად.
• 9.2. მომხმარებელი ანიჭებს უფლებამოსილებას კომპანიას, გადასცეს მისი პერსონალური მონაცემების აუცილებელი ნაწილი (მაგ. ავტომობილის ნომერი, ჯავშნის დრო) პარკინგის ოპერატორს მომსახურების ჯეროვნად განხორციელების მიზნით, ხოლო ფინანსური მონაცემები — საგადახდო პროვაიდერებს (Flitt / BOG) ტრანზაქციის დამუშავების მიზნით.

10. ინტელექტუალური საკუთრება

• 10.1. პლატფორმის დიზაინი, ტექსტი, პროგრამული კოდი, ლოგო, სასაქონლო ნიშანი („მოვედი მობილითი“ / Movedi Mobility) და ყველა დაკავშირებული ინტელექტუალური საკუთრების უფლება ეკუთვნის ექსკლუზიურად შპს „მოვედი მობილითი“-ს.
• 10.2. მომხმარებელს არ აქვს უფლება კომპანიის წინასწარი წერილობითი თანხმობის გარეშე დააკოპიროს, შეცვალოს, გავრცელოს ან გამოიყენოს აღნიშნული ობიექტები კომერციული მიზნებისათვის.

11. ხელშეკრულების ცვლილებები და მოქმედების ვადა

• 11.1. კომპანია უფლებამოსილია ნებისმიერ დროს ცალმხრივად შეიტანოს ცვლილებები წინამდებარე ხელშეკრულებაში. ცვლილებები ძალაში შედის პლატფორმაზე გამოქვეყნების მომენტიდან.
• 11.2. მომხმარებლის მიერ პლატფორმით სარგებლობის გაგრძელება ცვლილებების გამოქვეყნების შემდეგ ითვლება ახალ პირობებზე თანხმობად.
• 11.3. ხელშეკრულება ძალაში შედის მომხმარებლის მიერ რეგისტრაციის/სარგებლობის მომენტიდან და მოქმედებს ანგარიშის გაუქმებამდე ან ხელშეკრულების შეწყვეტამდე.

12. დავების გადაჭრა და მარეგულირებელი სამართალი

• 12.1. წინამდებარე ხელშეკრულება რეგულირდება და განმარტება საქართველოს მოქმედი კანონმდებლობის შესაბამისად.
• 12.2. მხარეთა შორის წარმოშობილი ნებისმიერი დავა ან უთანხმოება წყდება მოლაპარაკების გზით.
• 12.3. შეთანხმების მიუღწევლობის შემთხვევაში, დავა განსახილველად გადაეცემა საქართველოს საერთო სასამართლოებს საქართველოს კანონმდებლობით დადგენილი ქვემდებარეობისა და განსჯადობის მიხედვით.

13. საკონტაქტო ინფორმაცია

შპს „მოვედი მობილითი“ (Movedi Mobility LLC)

• საიდენტიფიკაციო კოდი: 404830279
• იურიდიული მისამართი: მთაწმინდის შესახვევი 7, თბილისი, საქართველო
• ელ-ფოსტა: help@movedi.app